Səyahət üçün internet planı seçərkən ən çox düşündürən suallardan biri də elə budur.
Kiçik paket seçsən, internetin səfərin ortasında bitə bilər. Ehtiyacından böyük paket alsan, istifadə etməyəcəyin data üçün əlavə ödəniş etmiş olarsan. Doğru seçim isə səyahətin müddətindən və telefondan necə istifadə etdiyindən asılıdır.
Gəl, səfərin üçün uyğun data həcmini birlikdə müəyyənləşdirək.
Əvvəlcə, bilməlisən ki, lazım olan internet həcmi telefondan necə istifadə etdiyindən asılıdır.
Səyahət zamanı data nəyə sərf olunur?
Xaricdə mobil internetdən, əksərən, xəritələr, mesajlaşma, taksi sifarişi, sosial media və rezervasiyaları yoxlamaq üçün istifadə edirik. Lakin hər tətbiq eyni həcmdə data sərf etmir.
Məsələn, mətn mesajı göndərmək çox az data istifadə etdiyi halda, yüksək keyfiyyətli video izləmək internet paketini qısa müddətdə azalda bilər.
Səyahətin müddətinə görə nə qədər data seçməlisən?
Doğru seçim gündəlik istifadə vərdişlərindən və səfər zamanı Wi-Fi-a nə qədər çıxışının olacağından asılıdır.
Az istifadə: Xəritə, mesajlaşma, e-poçt və rezervasiyaları yoxlamaq üçün gündə təxminən 100–300 MB kifayət edə bilər. Bu halda bir həftəlik səfər üçün 1–3 GB plan uyğun seçimdir.
Orta istifadə: Sosial media, musiqi, foto paylaşımı və arabir qısa videolar üçün gündə təxminən 300–700 MB tələb oluna bilər. Bir həftəlik səfər üçün 3–5 GB plan seçə bilərsən.
Aktiv istifadə: Tez-tez video izləyir, görüntülü zənglər edir, məsafədən işləyir və ya interneti başqa cihazlarla paylaşırsansa, gündə 1 GB və ya daha çox data sərf edə bilərsən. Bu halda bir həftə üçün ən azı 10 GB və ya böyükhəcmli plan daha məqsədəuyğundur.
Bu göstəricilər təxminidir. Wi-Fi istifadəsi data ehtiyacını azalda bilər.
Data sərfiyyatını necə azaltmaq olar?
Bir neçə sadə dəyişikliklə internet paketinin daha uzun müddət kifayət etməsini təmin edə bilərsən:
- Low Data Mode və ya Data Saver funksiyasını aktivləşdir.
- Xəritələri səyahətdən əvvəl oflayn istifadə üçün endir.
- Musiqi, film və podkastları Wi-Fi vasitəsilə əvvəlcədən yüklə.
- Foto və videoların buluda avtomatik yüklənməsini dayandır.
- Sistem və tətbiq yeniləmələrini Wi-Fi bağlantısına saxla.
- Video keyfiyyətini aşağı sal.
- İstifadə etmədiyin tətbiqlərin arxa fonda data sərf etməsini məhdudlaşdır.
- Hotspot funksiyasını ehtiyac olmadıqda söndür.
Data sərfiyyatını necə izləmək olar?
Telefonunun sazlamalarında hər bir tətbiqin nə qədər mobil data istifadə etdiyini görə bilərsən.
İstifadəni dəqiq izləmək üçün səfərin əvvəlində mobil data statistikasını sıfırlamaq da faydalı ola bilər.
Səyahətinə uyğun plan, ehtiyacın qədər internet.
Səyahət üçün doğru internet planı istifadə vərdişlərinə uyğun olan paketdir. Səfərin müddətini və gündəlik data ehtiyacını əvvəlcədən hesablamaq həm internetinin yarıda bitməsinin, həm də istifadə etməyəcəyin data üçün əlavə ödəniş etməyin qarşısını alır.
Wayro-da istiqamətini asanlıqla seçə, ehtiyacına uyğun data planını müəyyənləşdirə və səyahət boyu bağlantını nəzarətdə saxlaya bilərsən.
